Jan 12, 2009

Di Nakapapati, Ngem Pudno

Di Nakapapati, Ngem Pudno
Ni Rudy Ram. Rumbaoa
January 2009 Issue


"Ania Kaili, Agkarika Manen?"



AY, nalpas manen ti maysa a tawen! Kasla idi la kalman a pinasangbaytayo ti tawen 2008. Ngem ne, kasla insiwet ti panawen ket ita adtoyen ti 2009-- Year of the Ox. Karaho, manayonan manen ti edadtayo...

Ania ti kunam, Kailia, beso-beso, dinnakulap ken innarakup manen? Ne, saanta kadi a nagbeso-beso, nadinnakulap ken naginnarakup idi napalabas a tawen a kas tanda iti ayat, pammateg, kablaaw ken kappia iti panangsarabo ti Baro a Tawen?

Insapatam pay kaniak a mangabaruananka iti ugali ken kinataom. Impagarupko man, Kaili, no pinalubosamon dagitoy kunam a naalas a galadmo a makikuyog iti daan a tawen tapno adda lugar ti naimbag a gasat nga isangpet ti Baro a Tawen? Sa ita, 'bagam nga agkarika manen?

Pudno, Kaili, nagilistaka iti adu a New Year Resolution's ngem napaayka ta dimo nagun-od ti balligi. Ngem saan koma a tubeng dayta tapno irubbuatmo ti resolusionmo iti daytoy Baro a Tawen.

Kunak kenka, Kaili, adda dagiti kangrunaan a rason no apay a saanka a nagballigi a nangipatungpal gaputa nalabes unay ti ekspektasionmo iti bukodmo a kabaelan ken nagbalinka ketdi a saan a realistiko kadagiti banag nga aramidem.

Ania ngarud ti aramidek, kunam Kaili?
Makatulong ti nasalun-at a panunot a mangikeddeng iti limitasion ti madi nga aramid ken galad tapno magun-od ti balligi. Kas koma no plano ti tao iti agdiyeta gaputa isu ket nalukmeg unay, mabalin a saan a makatulong ti resolusion iti pannanganna kadagiti paboritona a taraon. Saan a matungpal dayta a tao ti gagemna nga agdiyeta ket saan nga agbayag ti resolusion. Ti napintas nga aramidenna, limitaranna ti agipauneg iti pagugustona a taraon.

Nasamay pay daytoy, Kaili. Solbaren ti problema iti nasapsapa, saan koma nga urayen manen ti sabali a Disiembre 31. Kas kenka, adu ti mamati nga agballigi ti maysa a tao iti resolusion no agplano iti nasapa. Dika agaramid iti resolusion iti bisperas ti Baro a Tawen wenno iti mismo nga aldaw ti Baro a Tawen. Gapuna, awan ti makuna a konkreto wenno natibker a plano no kasta. Ti aramiden? Ipaayan ti "stratehia a plano" ti resolusion.

Sabali pay, Kaili, saanmo a padpadasen a gun-oden ti resolusion iti ababa a panawen. Wenno, paggigiddanen nga aramiden. Ipamaysa ketdi ti kangrunaan a resolusion a kayatmo a matungpal. Pilien ti maysa a panggep wenno tarigagay nga aramiden iti daytoy a tawen babaen iti natibker a plano.

Kaili, no awan ti umno a plano, daytoy ti makagapu a saanka nga agballigi iti resolusion. Kastoy, ilista dagiti plano no kasano a supringen ti panakasulisog. No saanmo nga aramiden, sigurado a dayta ti agbalin a rason wenno tubeng no apay a mabaybay-an ti resolusion. Mabalin nga inayon ditoy ti gunguna wenno panangdusa iti bagi no agtalinaed wenno mapaay kadagiti plano. Ken nasayaat met no agpatulong iti maysa a gayyem.

Importante met a pangayangayen ti bukod a bagi tapno agballigi ti resolusion. Kitaen no umisu ti gunguna nga awaten a saan a gaputa agsakripisio, imbubos ti tiempo, ipeksa wenno aramiden, ken agan-anuska para iti resolusion. Agtalinaed koma ti bileg ti tarigagay. Kanayon a palagipan ti bagi iti benepisio nga inka awaten no agballigika iti resolusion.

Kaili, dimo koma ilimed dagiti resolusionmo. Saanka nga agamak no adda sao't sabali a tao kenka gaputa napaayka. Saanka a perpekto. Dimo denggen ti kantiawda. Wenno dika mabainan.

Napintas ketdi no ikamang daytoy iti maysa a gayyem a kapada iti resolusionmo. Iti daytoy a wagas, makita no adda progreso ken agtinnulongkayo nga agpadpada. Sa maysa pay, naimbag met no awaten ti tulong manipud iti maysa a gayyem ken miembro iti pamilia tapno agtalinaedka nga agtungpal iti resolusion.

Tay kunak, Kaili, dika maupay. Kasta a talaga iti pagdammuanna, mabalin a narigat a garawen wenno baliwan ti plano. Adda ketdi dagiti sulisog a makagapu ket daytoy ti rason no apay a baybay-an ti resolusion. Liklikan koma dagitoy a panakapiting. Agplano a nasapa no ania iti mabalin nga aramiden no dumteng ti kastoy a situasion. Agtalinaed a nabileg iti tarigagaymo.

Kuna dagiti eksperto: pataudem ti baro a pagugusto wenno nasged a tarigagay nga aramiden iti inaldaw-aldaw. Makatulong daytoy a wagas a mangiwalin wenno mangkugtar iti naalas nga aramid.

No saan, pagtalinaedem ti panunot nga aginana ta adu iti panakasuot kadagiti umun-una nga aldaw a panangirugi iti plano. No saanmo nga aramiden dayta, awisen latta ti sulisog nga ituloy ti nakairuaman nga aramid.

Ne, kitaen met no adda progreso iti mision ti resolusionmo. Gungunaan wenno dayawen ti bagi kadagiti babassit a balligi. Dika agladingit no adda man pannakapaay. Ketdi, amirisen dagiti biddut no apay nga immikay dagitoy a plano. Tulongan ti bagi.

Nasayaat no maimaldit daytoy a pagdur-asan iti diary. Ken tapno saan a malipatan, mangisab-itka iti maysa a pakalagip iti sadino man a paset iti balay a nakasuratan dagiti resolusion a kayatmo nga aramiden. No saan, ibagam kadagiti gagayyemmo ta palagipandaka.

Ken kamaudiananna, Kaili, laglagipen koma a saan nga insigida iti panangikkat wenno panangikugtar dagitoy nga ugali ken madi nga estilo iti panagbiag. Saan nga ekspektaren iti alisto a panagballigi. No napaayka man, padasen manen. Ngem masapul met a mataraonan ti panunot iti Nasantoan a Balikas manipud iti Dios.*
____________________________________


No comments:

Post a Comment

Recent Posts