Ti Pannakayanaktayo Manen ken Ti Dalan ti Biag Nga Agtunda Agnanayon

Ni Rev. Walter Baloaloa
Nailangitan A Banag, Fil-Am Observer
Opinion Section, Page 5



Manipud iti Naimbag a Damag kas insurat ni San Juan 3:1-8, mabasatayo dagiti sumaganad:

Adda idi Fariseo nga agnagan iti Nicodemo, maysa a pangulo dagiti Judio. Iti maysa a rabii, napan ni Nicodemo ken ni Jesus. “Rabbi,” kinunana, “ammomi a maysaka a maestro nga imbaon ti Dios. Awan ti makaaramid kadagitoy a milagro nga ar-aramidem malaksid no adda kenkuana ti Dios.”

“Ibagak kenka ti pudno,” kinuna ni Jesus. “Awan ti makakita iti Pagarian ti Dios malaksid no mayanak manen.” “Kasano a mayanak manen ti tao a nataenganen?” sinaludsod ni Nicodemo. “Mabalinna aya ti sumrek iti aanakan ni inana tapno mayanak manen?”

Ibagak kenka ti pudno,” insungbat ni Jesus. “Awan ti makastrek iti Pagarian ti Dios malaksid no mayanak iti danum ken iti Espiritu. Ti tao ipasngayna ti tao; ket ti Espiritu, ipasngayna ti espiritu. Dika masdaaw no kunak kenka, Masapul a mayanakkayo manen. Agpuyupoy ti angin iti sadinoman a kayatna. Manggegmo ti awerna, ngem dimo ammo ti paggapuan wenno pagturonganna. Kasta met ti mapasamak iti tunggal maysa a mayanak iti Espiritu.”

Ni Nicodemo napan ken ni Jesus iti rabii ta kayatna ti makisarita kenkuana. Ni Nicodemo ket adda kenkuana iti nasikap a kababalin a nakaiparangaran ti dua a kita ti biag.

Umuna, ni Nicodemo a maysa a Fariseo ken pangpangulo dagiti Judios ket adu ti ammo wenno sursurona maipapan kadagiti taga-Galilea. Siasinoman a Fariseo iti Israel masapul a naannadda a makisarsarita ken Jesus ket mabalin a kaay-ayoda isuna wenno supringenda dagiti pannursurona.

Iti sabali a bangir, kayat ni Nicodemo a penken daytoy a “rabbi” wenno maestro nga ti pannursurona ket aggapu iti Dios. Ket kas agbibiag iti nagkadua (living in two lives), kayatna a sukisoken dagiti salsaludsod iti panunotna, isu a napan ken Jesus iti rabii tapnon saan a makita dagiti sabsabali. Nagangayanna, ammotayo a ti biag ni Nicodemo ket nabalbaliwan ket ti relasionna ken Jesus ket napabaro.

Nagbibiag ni Nicodemo iti dua a kita ti biag aginggana iti ipapatay ni Jesus. Saanna met ketdi a kinarit wenno dinipendaran nga iti maysa a Fariseo ket saanto a pulos mamati ken Jesus ngem dinipendaranna ketdi a masapul a manggegan ni Jesus no ania ti mensaje a kayatna nga iburay. Ket kalpasan ti ipapatay ni Jesus, ti nagkadua a kabibiag ni Nicodemo nabalbaliwan. Saanen a mapan ken Jesus iti rabii. Isu pay ketdin ti kinadua ni Jose a nangsapsapo iti bagi ni Jesus iti bangbanglo ken isuda a duan iti nangipan kenkuana iti tanem. Masarakan daytoy iti Juan 19:39-42). Pinanawan ni Nicodemo ti nagkadua, agmangngamangnga, ken agngatangata a biag ket sinurotna iti nabalbaliwan, pudpudno, ken maikadua a biag kas namati ken Jesus.

Ania kadi iti imbalikas ni Jesus ken ni Nicodemo a nakaigapuanan ti pannakabalbaliw ti panunot ken biagna? Daytoy a balikas ket “anothen” iti Griego, “again” iti Ingles, wenno “manen.” iti Ilokano. “Awan ti makakita iti Pagarian ti Dios malaksid no mayanak manen,” kinuna ni Jesus. Namitlo a daras nga insawangna daytoy a balikas, a kayatna a sawen ket naespirituan a pannakabalbaliw ti biag. “Born-again” ti popular a mangmanggegantayo maipapan kadagiti Cristianos a binalbaliwan ken pinabaro ni Jesus ti biagda. Tallo ti nakaiyuloganna iti pagsasao dagiti Griego maipapan iti sao a “manen”: manipud sadi ngato, manipud idi punganay, ken manen. Malaksid no mayanaktayo manen iti naespirituan a pannakayanak, awanto iti kaimudingantayo iti Pagarian ti Dios wenno sadi langit.

Nasnasdaawan ni Nicodemo no kasano a mayanak manen ti tao idinto a lakayen. Kayatna kadi a sawen nga agsubli manen iti aanakan ni inana ket mayanak manen iti maikadua? Ni Jesus naawatanna iti panagduadua ni Nicodemo isut’ gapuna nga inggunamgunamna kenkuana ti tulbek a manglukat iti pagarian ti Dios, nga isut’ “born-again” wenno biag a nabalbaliwan. Ni Jesus sarsaritaenna maipapan iti “invisible” a pannakayanak iti ngato a mangbuangay iti makita a panakabalbaliw ti biag.

Ni Jesus ibagbagana ken ni Nicodemo a ti dua nga kita ti kabibiagna ket saan nga isut’ mangitunda kenkuana iti pagarian ti Dios. Masapulna ti mabalbaliwan. Masapulna ti mayanak manen. Maikadua a biag. Baro a biag. Manipud iti Dios Ama a nailangitan. Kadatayo itatta nga agdama, masapul nga ipakawantayo dagiti amin a nagkurkurangantayo iti Apo ket awatentayo isuna a mangisalakan kadatayo ket magun-odantayonto daytoy maikadua ken agnanayon a biag idiay ngato a kdua ti Apo. Gapu iti parabur ken ayatna, pakawanennatayo.

Maysa pay: ti pannakayanak manen nalawag nga ipaneknekna ti maipapan iti angin. Ti angin saanmo a mabalin a kontrolen wenno makita ngem ammom nga adda gapu iti gapuananna. No napigsa unay dadaelenna dagiti mulmula ken ipuyupoyna dagiti bulbulong. Napintas ti panagkuna ni Evangelist Billy Graham a saantayo kano a makita ti angin ngem makitatayo dagiti gapuananna.

Tapnon makitatayonto ti Pagarian ti Dios kas impasingked ni Jesus, masapultayo ngarud ti pannakayanaktayo manen!***
_____________________________