Dua a Puso, Dua a Relihion, Maysa nga Ayat

[Nabulod laeng ti ladawan a naaramat iti salaysay]

NATURTURAY kadi ti ayat ngem iti panagserbi? Ngem naturay met ti agserbi no ti iserbiam ket ti ay-ayatem.

Kastoy ti nagbalin a pakasaritaan ti ayan-ayat da Walter Baloaloa ken Pricila Oliver Echalas. Manipud iti kinaagtutubo, asidegen ti rikna ni Walter nga agserbi iti Dios kas maysa nga alagaden ti Protestante. Idinto ti kasimpungalanna, dimmakkel ni Pricila iti salinong ti simbaan ti Romano Katoliko. Nangato ti arapaapda nga agpadpada. Ngem saan ketdi a dayta ti tubeng ti panaginnasideg ti riknada iti laksid nga agsupadi ti relihion a nakikappenganda. Adda ketdi bileg a nangiduron ti rikna dagitoy dua a parsua- puso nga agserbi iti Dios ken agbalin a pagulidanan iti pudno a kaipapanan ti serbisio iti komunidad.

Adu idi dagiti pannubok ti biag a nakasuotanda ket yarigda dagitoy a kas kalsada nga adu ti turongen wenno kamanganna, ngem iti likudan daytoy, di ammmo ti 'yan ti ungto ken papanan dagitoy a dalan. Dakkel ketdi ti pammatida iti Dios ta naipaayanda iti bendision tapno akmenda ti naisagana nga aramidenda- ti agserbi.

Nayanak ken dimmakkel ni Walter idiay Baruyen, Bangui, Ilocos Norte. Tinurposna ti kina-Bachelor of Arts in Theology iti Northern Christian College iti Siudad ti Laoag idi tawen 1972. Bayat ti preparasionna iti biag ti kina-ministro idiay Filipinas, adu ti nagbalin a padasna a nailatak iti Hawaii. Naturposna iti Congregation of the Maui Evangelical Church iti Kahului, Maui, ti lima a tawen a building program a masarakan iti Hina Street. Ket babaen ti Certificate of Completion a naawatna manipud iti Ayson Contractors, nakasagana ni Walter nga idedikar ti biagna iti karbabaro a nabangon a lugar ti pagdaydayawan.

Agkasapulan idi ti United Church of Christ [UCC] iti maysa a pastor ket naited ken ni Walter dayta nga opurtunidad. Adda idi sangsangaili a kameng ti pammati a nangbisita kadagiti pamiliada iti Filipinas ket nairana a nangngegda ti panagsermon ti kabarbaro a reberendo Walter Baloaloa- ti panangikasaba ti Naimbag a Damag, ti immuna nga impaaramid ti UCC Laoag kenkuana. Nagutigot dagitoy a sangaili iti panagsermon ti reberendo ket masiguradoda nga isu ti tao a sapsapulenda nga agserbi iti posision a nabakantean iti UCC ti Maui. Nagkaykaysaan dagitoy nga opisiales nga ibaon ni Walter iti UCC Maui. Dagus a naipagna dagiti papeles ken church protocols tapno agserbi a kas maysa a non-citizen ken agtrabaho para iti UCC iti America.

Nayanak ni Pricila idiay Pangasinan. Nagturpos iti kina-Valedictorian iti Urdaneta High School. Naipasana amin ti lima nga eksaminasion nga inted dagiti lima nga unibersidad a kayatna a serkan a pagbasaan, ngem pinanawanna ti Pangasinan gapu ti arapaapna nga agturong iti America. Nagturpos iti Bachelor of Business Administration, major in Marketing and Finance. Naawatna ti diploma manipud iti Institute of Financial Education. Ket gapu kadagitoy a credentials, nakarit ti rikna ni Pricila a serkenna ti banking world.

Bayat dagiti umuna a bulan a kaadda ni Pricila iti Maui, masansan idi ti panagturongna iti simbaan. Umuna, mapan agdengngeg iti misa ket kalpasanna, agturong iti Maui Evangelical Church a kaduana ti anti-na. Ket gapu ti daytoy, nagbalinen a kustombre ti kanayonna a pannakakita ken ni Walter iti kongregasion.

Nangrugi a nagtrabaho ni Pricila iti maysa a pasdek pangpinansial- ti Institutional Savings ti Kahului kas part-time teller. Idi 1974, naital-o a kas full-time teller. Manipud ditoy, nagtrabaho agingga a nagbalin a Branch Manager. Ket idi 1988, simmangbay kenkuana ti napintas nga opurtunidad iti trabaho. Inawatna ti indiaya ti Pioneer Federal Savings a posision a kina-Assistant Vice President ken Branch Manager para iti sanga ti Kahului ken Kihei.  Manipud nakikadua ti Pioneer Federal Savings iti First Hawaiian Bank idi 1997, iggem ni Pricila ti posision a kina-Branch Manager ken Personal Banking Officer ti Wailuku Branch.

Iti naminsan a panagbuya ni Pricila iti Miss Maui Filipina pageant idi 1975, mariribukan unay daytoy ta awan ti pagluganna nga agawid. Ni Rev. Baloaloa idi ti nangted ti invocation iti nasao a programa. Idi nadlaw ti reberendo ti panagdandanag ti balasang, inyawisna iti panangitulnogna ken ni Pricila. Saan a nagkedkedan ti balasang. Ket apaman a nakaawid ni Walter iti pagtaenganda kalpasan a naitulnogna ti balasang, nakaawat iti tawag ti telepono manipud ken ni Pricila a nangkiddaw kenkuana nga isurona ti balasang nga agmaneho iti lugan no addanto waya daytoy. Awan ngamin ti naan-anay a tiempo dagiti kabbalay ni Pricila a mangisuro kenkuana ta masansan nga addada amin iti trabaho. Gapu ti daytoy, naluktan ti dalan iti panaginnasideg dagiti pusoda. Nabukkaan ti nabayagen a kinupkupikopanda a rikna. Ditoy ti namuangayan ti amin. Ditoy a naipasngay ti napudno nga ayat.

Iti panaglantip dagiti puso da Walter ken Pricila idi Marso 6, 1976, nakipagra-o ti komunidad kadakuada. Iti pannakayanak ti umuna a bunga ti ayan-ayatda, ni James Eric, idi Nobiembre 4, 1977, nabangon ti pamilia. Iti dayta met la a tawen, gimmatangda iti umuna a balayda nga aggatad iti $52,000- house and lot. Ngem kapilitan a nagsardeng ni Pricila iti trabahona tapno adda agaywan ti anakda. Gapu ti daytoy, sinerrek ni Walter ti sabali pay a pamataudan iti pagbiag, nakaala iti lisensiana nga agisagana para iti income tax services. Ni met la Walter ti agtagikua ken mangimaniher ti Baloaloa's Income Tax Services- serbisio a mangipapaay pay iti bookkeeping. Kalpasan ti lima a tawen, idi Hunio 30, 1982, nayanak ti maikadua nga anakda, ni Shani Leah.

Nagatendar ni Rev. Baloaloa iti Great Lakes Church Leadership School idiay Michigan State University ket nagturpos iti kurso a Psychology ken Counseling. Daytoy ti nanglukat iti ad-adu nga edukasion ken nagun-odna ti Master of Arts in Bible and Religion idiay Gateway Christian University, Alabama, idi tawen 1981. Naawatna ti kina-eskolar manipud iti National Coordinating Council for Women of the UCC idi 1984, tapno pagadalanna ti set-up ti UCC. Kas resulta daytoy, nabangon ti Hawaii Council of Filipino Ministries [HCFM] idi 1986. Isu pay ti napusgan a tesorero ti konseho, ken iti lokal, isu ti presidente ken nagserbi pay iti sumagmamano a posision ti Tri-Isle Mokupuni [Association].

Nagserbi a Supply Pastor of Paia Hawaiian Protestant Church idi 1985. Manipud 1996, ni Walter ti maysa kadagiti timmulong iti pannakaisubli ti Haiku Protestant Church [Kalanikahua Hou], ken ditoy a nagserbi iti pito a tawen. Kannayon ti kina-pastorship ni Rev. Baloaloa, aktibo pay iti aktibidades ti UCC. Manipud 1985-1989, miembro iti Council for Health and Welfare Services; Corporate Member ti UCC Board for Homeland Ministries, 1994-1997; namindua a nangibagi idiay General Synod of the UCC. Iti state level, miembro daytoy iti Board of Directors, Church Development Committee, Nominating Committee ken Scholarship Committee.

Nabenipisiaran ti komunidad ti Maui iti boluntario a serbisio publiko ni Rev. Baloaloa. Nagserbi iti County of Maui Commission on Aging manipud 1990-1993, ken iti Commission on Culture and the Arts, 1994-1997. Manipud idi 1981, miembro iti Kahului Kiwanis Club. Nangrugi a nagmiembro iti Maui Filipino Chamber of Commerce idi 1994, ken nakagun-odanna ti Gintong Pamana Leadership Award idi 1999. Iti pannakikaduana ken ni David Murata, isuda ti nangidaulo ti pannakabangon ti Maui Adult Day Care Center a nangrugi a nangipaay iti service program iti Maui Evangelical Church. Isu ti maysa kadagiti orihinal a Board member.

Kas ken ni Walter, atiddog met ti pakasaritaan nga impaay ni Pricila iti panagboluntariona a nakabenisiaran ti Maui. Nagserbi iti Board of Directors ken miembro ti The Make a Wish Foundation, March of Dimes ken Junior Achievement. Iti lima a tawen a nagsasaruno, nagserbi a kas Chair ti Mrs. Maui Filipina Pageant ken General Chairperson ti Mr. & Mrs. Filipino Centennial Pageant. Iti pannakabigbigna iti adu a serbisio pampubliko, naawat ni Pricila ti Maui Filipino Chamber of Commerce Gintong Pamana Leadership Awards ken ti Binhi at Ani Outstanding Member Award. Isu ti author ti kapitolo ti Finance "Means to a Destiny Freater Than Ourselves" iti table book ti "Anak," maysa a limited edition a libro nga adda iti aywan ti Maui Filipino Centennial Celebrations Coordinating Council- pagdayaw kadagiti Filipino ti Maui--iti napalabas, ti agdama ken ti masakbayan.

Nagun-od pay ni Pricila dagiti sabsabali a pammadayaw a kas iti PFSB Branch Manager Award, President's Club Award, Personal Banking Officer, ken President's Club Award of the First Hawaiian Bank. Nagserbi pay a kas Director ken Treasurer ti Maui Habitat for Humanily. Iti nagtipon a proyekto, co-founding members da Walter ken Pricila iti Habitat for Maui, Inc.

Nupay agsupadi ti relihion ngem nagbalin nga inspirasion dagiti bunga, di mailadawan no kasano ti ragsak ti balligi dagitoy nga agasawa. Umir-irut ti relasion ken tumibtibker ti pondasion ti pamilia. Ket uray kasano ti kaadu ti ling-et a nagtedted bayat iti panangisaganada ti napintas a masakbayan ti pamilia, adda met gunguna a naawatda: ni James Eric, maysan a Director of Marketing for the State of Hawaii para iti Anheuser-Busch; idinto a ni Shani, agtartrabaho a kas Claims Examiner/Investigator for Geico Insurance.

Nasuboken dagiti Baloaloa a kas natibker a pamilia. Nasursuro metten ni Pricila nga awaten ken aprisiaren ti kina-ministro ti kaingungotna ta nagserbi daytoy a kas prayoridadna iti nalablabes pay nga itden ti kinamaterialistiko a lubong-- daytoy ket awag ken agserbi a sitatallugod iti Dios.

Imbasar ni Pricila ti panagawatna iti daytoy a kina-ministro iti Hippocratic Oath: "Naikumit ken seliado ti sapatam nga agserbi iti Dios a kas maysa a ministro iti agnanayon." 

Nagyaman ni Pricila iti Dios gapu ti balligi a nagapuanan ti pamiliada: ti pannakabigbigda, ti serbisio publiko iti komunidad a naipaayda, ti ayan-ayatda ken ni Walter a daytoy ti pakapnekan a saan a tubeng ti agserbi iti Dios uray pay agsupadi ti relihion a nakikamenganda. Wen, ti agserbi iti asinoman, iti sadino man...sadiay, agnanayon a nakalukat dagiti pusoda.

*[Pimmusayen ni Rev. Walter Baloaloa]

DUA A PUSO, DUA A RELIHION, MAYSA NGA AYAT
Rudy Ram. Rumbaoa
Di Nakapappapati Ngem Pudno

Fil-Am Observer, February 2011 Issue

Opinion Section, Page 5