Adda Ragsak iti Laksid ti Kaawan Mabalinan

[Nabulod ti ladawan a naaramat]

MAYSA nga eksena iti ospital.

Dua a lallaki nga addaan ti nakaro a sagsagabaen ti nangukopar iti maysa a siled. Maysa kadakuada ti impalubos ti doktor nga agtugaw iti iking ti katre iti maysa nga oras ti tunggal malem tapno mapaatianan ti bara daytoy a nakaurnongan ti adu a danum. Asideg iti katre daytoy ti kakaisuna a tawa ti nasao a siled, idinto a nakaidda latta ti sabali a masakit iti katre nga agmalmalem. Kanayon nga agpatpatang dagiti dua a masakit. Pasaray pagsaritaanda ti maipanggep dagiti assawa, ti pamilia, ti pagtaengan, ti trabaho, ti panagkamengda iti militar ken no sadino a lugar ti kayatda a pagbaksionan.

No madanonanen ti malem, agtugaw ti masakit nga adda iti asideg ti tawa ket ditoy nga ibusenna ti orasna babaen ti panagestoria ken panangiladawanna iti sabali a masakit dagiti banag a makitana iti ruar ti tawa. Namrayan lattan ti piman a masakit a nakadatay nga agdengngeg iti estoria ti kaduana nga adda iti asideg ti tawa. Kasla makitana met dagiti aktibidad a mapaspasamak ken no kasano ti kinamaris ti lubong nga adda iti labes ti tawa.

Ti tawa sumango iti maysa a parke nga addaan ti nalawa a danum iti tengnga ti daga. Masalibukag iti rikna ti palayupoy ti angin a mangapros iti rupa. Nakapimpintas a buya. Adda dita dagiti aglanglangoy a pato,
idinto nga agay-ayam dagiti ubbing kadagiti de-remote control a model boats. Adda met dita dagiti agkikibin nga agtutubo ken agayan-ayat a magmagna ken manglawlawlaw iti parke. Sabali laeng ti playground a nairanta a para kadagiti ubbing. Makaay-ayo met a buyaen dagiti nagduduma ti kolorna a klase ti sabsabong a naimula iti pagnaan.

Iti panangiladawan ti masakit nga adda iti asideg ti tawa ti kompleto a detalye daytoy, ikidem met ti nakaidda a masakit dagiti matana- agarapaap, kayatna nga ipinta iti panunotna ti buya a makitkita ti padana a masakit.

Iti maysa a napudot a malem, imbaga ti masakit nga adda iti asideg ti tawa a mannarimaan ti panaglabas ti parada. Ngem ti masakit a nakaidda, dina mangngeg ti uni ti banda. Kunana iti unegna, "No koma laeng addaak iti asideg ti tawa, mabuyak met ti parada." Babaen iti panangisalaysay ti masakit nga adda iti asideg ti tawa dagiti mabuyana, umanayen daytoy para kenkuana.

Naglabas ti aldaw ken lawas. Iti maysa nga agsapa, simmangpet ti day-shift nurse tapno asikasuenna ti panagdigos dagitoy dua a masakit idi maduktalanna laengen a nalamiis a bangkay ti masakit nga adda iti asideg ti tawa. Pimmusay ti masakit iti pannaturogna. Nalidayan ti nurse ket dagus nga impakaammona iti administrasion ti ospital ti napasamak. Naipakaammo iti pamilia, kabagian ken gagayyemna. Di mabayag, impanaw dagiti hospital attendants ti pimmusay a masakit iti kuarto.

Apaman a naurnos ti amin, sinaludsod ti nabati a masakit iti nurse no mabalin a mayakar ti katrena iti asideg ti tawa. Naragsakan ti nurse a nangyakar kenkuana. Sinigurado nga immuna ti nurse a komportable ti masakit iti baro a lugarna sakbay a pinanawanna daytoy.

Nupay naut-ot ti panagrikna daytoy a masakit, inkarigatanna a tinerred ti bagina nga agtugaw iti iking ti katrena tapno iti umuna a gundaway, mataldiapanna ti pudno a lubong iti ruar dayta a tawa. In-inut ngarud nga inwarasna ti panagkitana. Ngem iti siddaawna, maysa laeng a blangko a diding ti adda iti masangnguananna.

Gapu ti daytoy, inayabanna ti nurse ket dinamagna no apay nga ipilit ti pimmusay a gayyemna nga adda dagiti makitana nga agkakapintas a banag iti labes dayta a tawa. Inlawlawag ngarud ti nurse kenkuana a bulsek ti pimmusay a gayyemna. Ken ni kaanoman, saanna a makita ti aniaman nga adda iti uneg ken ruar ti kuarto.

Kuna ti nurse, "Siguro, dina la kayat a maupayka. Kayatna a papigsaen ti pakinakemmo nga umimbag iti sakit a sagsagabaem. Kayatnaka a pangnamnamaen..."


*Pampanunot/Adal: "Dakkel a ragsak no maparagsakmo ti sabali, uray pay no ania ti agdama a situasiontayo. Makipagrikna iti sasaaden tapno bumassit ti panagladingit. Ti ragsak nga iburaymo't sabali- madoble ti ayat a masagrapmo. No kayatmo a marikna ti sasaaden ti maysa a baknang, nawaya a mariknam ta saan amin a banag ket magatang ti pirak."


ADDA RAGSAK ITI LAKSID TI KAAWAN MABALINAN
Di Nakapappapati, Ngem Pudno
Ni Rudy Ram. Rumbaoa
Fil-Am Observer, November 2007 Issue
wwwfilamobserverarticles.blogspot.com